Boka er forfatta av Ole David Brask, psykologspesialist og førstelektor, May Østby, vernepleiar og førstelektor, og Atle Ødegård, psykologspesialist og professor. Alle har vore sentrale i utviklinga av vernepleieutdanninga ved Høgskolen i Molde gjennom mange år.
Rolleforståelse, handlingsrom og fagleg skjønn
– Dette er ei bok for deg som er vernepleiar, underviser vernepleiarstudentar – eller er under utdanning. Målet er å styrke bevisstheita rundt yrkesrolla, og bidra til både fagleg forankring og inspirasjon i kvardagen, seier Atle Ødegård, psykologspesialist og professor ved Høgskolen i Molde.
Boka viser fram kor samansett og relasjonelt vernepleiefaget er gjennom dei fire kjernerollene: partnerrolla, ansvarsrolla, brobyggjarrolla og pådrivarrolla. Lesaren får innsikt i vernepleiaren si rolle i kunnskapsbasert praksis, og legg vekt på profesjonell tryggleik, fleksibilitet og medviten relasjonskompetanse.
Forfattarane rettar eit skarpt blikk mot det som skjer i samspel med brukaren, og inviterer til refleksjon rundt verdigrunnlag, handlingsrom og fagleg skjønn.
Oppdatert i tråd med nasjonale retningslinjer
Den nye utgåva er revidert og oppdatert i tråd med nasjonal retningslinje for vernepleiarutdanning frå 2019, og inneheld mellom anna:
-
Ny forsking, faglitteratur og relevant lovverk
-
Praksisnære forteljingar frå 16 erfarne vernepleiarar
-
Eit tydeleg fokus på brukarperspektiv og relasjonelt arbeid
Med konkrete situasjonar frå feltet og refleksjonsverktøy til bruk i undervisning eller fagleg utviklingsarbeid, er boka meint å vere eit ankerfeste i yrkesutøvinga – og eit verktøy for kritisk tenking og vidareutvikling av praksis.
Boka blir lansert 8. juli 2025.