Dette er regulert i forskrifta §§12-22 og i utfyllande retningsliner §§18-21.
Levering av avhandlinga
Når kandidaten har kome så langt at rettleiarane har gitt klarsignal for at avhandlinga kan leverast for bedømming, skal dette skje.
Kandidaten utformar avhandlinga i samsvar med dokumentmaler for avhandling. Kandidaten kan søkje hjelp hjå Trykkeriet ved Høgskolen i Molde. Avhandlinga skal sendast til sekretær i Doktorgradsutvalet i pdf-format saman med Søknad om bedømmelse av ph.d.-avhandling og medforfattarerklæringar (om det er artikkelbasert avhandling).
Sekretær for Doktorgradsutvalet sjekkar om opplæringsdelen (30 stp) er fullført og at aktuell dokumentasjon er på plass. Dette skjer i samråd med studieadministrasjonen.
Oppnemning av bedømmingskomité
Hovudrettleiar skal fremme forslag til bedømmingskomité, og dette framlegget skal handsamast av Doktorgradsutvalet. §14 i forskrifta seier dette om samansetjing av komitéen:
Komitéens sammensetning bør være klarlagt ved innleveringstidspunkt. Bedømmelseskomitéen skal normalt settes sammen slik at:
- begge kjønn er representert
- minst to av medlemmene er uten tilknytning til høgskolen
- minst ett av medlemmene har hovedstilling ved en utenlandsk institusjon
- alle medlemmene har doktorgrad eller tilsvarende kompetanse.
Habilitetsreglene i forvaltningslovens § 6, jf. § 10, gjelder for komitéens medlemmer.
I følgje §14 i utvida retningsliner gjeld også dette:
Medlemmer i bedømmelseskomitéen kan ikke ha hatt sampublisering med veileder(e) eller kandidat de siste 5 årene.
Forslaget til bedømmingskomité skal sendast til sekretær i Doktorgradsutvalet saman med CV til eksterne medlemmar og habilitetsskjema. Hovudrettleiar sørgjer for at skjema er utfylt og signert, samt at CV-ar og habilitetsskjema er på plass. Bedømmingskomité bør vere klar når kandidaten er klar for å levere.
Etter levering
Etter at kandidaten har levert avhandlinga og bedømmingskomitéen er godkjent av Doktorgradsutvalet, sender sekretær for Doktorgradsutvalet søknad om bedømming, medforfattarerklæringar og sjølve avhandlinga frå kandidaten for vidare oppfølging ved den avdelinga kandidaten høyrer til ved ein av dei to høgskulane. Vedtak om godkjenning av komité og samansetninga til komitéen følgjer også vedlagt.
Den aktuelle avdelinga sender deretter avhandlinga til komitémedlemmane saman med eit signert følgjeskriv som skisserer prosessen vidare. Komitéen har tre månadar på å vurdere avhandlinga og kome med si innstilling. Kandidaten får samtidig eit signert skriv, der det vert orientert om komitéen si samansetning, om tidsrammene og om prøveforelesing og disputas.
Kandidaten får også tilsendt lenkje til pressemeldingsskjema og kontaktinformasjon til kommunikasjonssjef for avtale om fotografering. Hovudrettleiar og kommunikasjonssjef får kopi av dette skrivet.
Dersom komitéen tilrår omarbeiding av avhandlinga, jf. forskrifta §15-3, og avdelinga tillet det, vil det løpe ein ny frist på tre månadar frå den dato avhandlinga vert levert på nytt. Det skal normalt se
Retting av formelle feil i avhandlinga (§15-4)
Kandidaten har høve til å rette formelle feil i avhandlinga etter innlevering. Kandidaten må då utarbeida eit fullstendig oversyn over dei feila (errata) som blir ønskt retta og sende dette inn seinast fire veker før komitéen sin frist for avlevering av innstilling. Retting av formelle feil kan berre skje éin gong.
Etter godkjenning
Når komitéen si innstilling ligg føre, kan avdelinga i samråd med kandidaten og komitéen avklare endeleg dato for prøveforelesing og disputas.
Avdelinga sender avhandlinga til trykking, samt set i gang prosess med klargjering av lokale, bestilling av lunsj og mottaking, invitasjonar, kunngjeringar m.m.
Prøveforelesinga
Bedømmingskomitéen fastset tema for prøveforelesinga og administrativ kontaktperson kunngjer temaet for kandidaten 10 arbeidsdagar før forelesinga skal haldast. Prøveforelesinga skal teste kandidaten si faglege modenheit, og temaet skal difor ligge utanfor avhandlinga sitt spesialområde. Prøveforelesinga skal vidare teste kandidaten si evne til å disponere stoff og tid, og skal vare i 45 minutt.
Disputasen
Disputasen vert leia av dekan eller den dekan gjev mynde. Kandidaten sine rettleiarar eller administrator av bedømmingskomitéen skal ikkje leie disputasen. Komitéen avgjer rekkjefølga på opponentane og komitéen sin administrator informerer om denne. Disputasleiaren opnar disputasen med ein kort formell introduksjon av doktoranden, om oppnemning av bedømmingskomitéen og om gjennomføringa av prøveforelesinga. Deretter presenterer kandidaten sitt arbeid. Kandidaten sin presentasjon bør ikkje vare lenger enn 20 minutt.
Bedømmingskomitéen fungerer som opponentar. Den første av opponentane plasserer kandidaten sitt vitskaplege arbeid inn i ein internasjonal samanheng, før drøftinga av avhandlinga startar og kandidaten får høve til å forsvare arbeidet. Etter at alle opponentar har avslutta sin opposisjon, vert det gitt høve for andre som er til stades til å kommentere ex auditorio.
Prøveforelesing og disputas vil verte halde på det språket som vart bestemt ved søknad om bedømming, og er ope for publikum. Etter at disputasen er ferdig, held bedømmingskomitéen eit kort møte. Komitéen sin administrator vil deretter informere kandidaten om utfallet av disputasen.
Etter disputasen gir bedømmingskomitéen ei innstilling til avdelinga (på eige skjema) der den gjer greie for korleis den har vurdert prøveforelesinga og forsvaret av avhandlinga. Innstillinga skal konkludere med om prøvene samla sett er godkjent/ikkje godkjent (jfr. UHRs anbefalte bestemmelser for evaluering av norske doktorgrader). Innstillinga skal grunngjevast dersom disputasen vert tilrådd ikkje godkjent. På skjemaet skal det utanlandske medlemmet i komitéen gi ein eigen uttale som samanliknar nivået på den føreliggande avhandlinga med det generelle nivået på doktorgradsavhandlingar på tilsvarande fagområde ved eigen institusjon.
Kreering
Etter godkjent prøveforelesing og disputas, vert det lagt fram ei sak for høgskulestyret om kreering av kandidaten. Deretter kan studieadministrasjonen skrive ut vitnemål.